L'dressache d'un quien.

"L'eute jour je m'proumneus in ville trinquille comme Batisse. Pa-d'vint mi y'aveut un homme qui sorteut sin tiot quien loïé à inne laisse. Quind l'quien y saqueut su l'laisse pou aller arnifler l'pied d'un ape o bé d'un mur, sin maïte y preneut inne ceinture in cuir pou taper su l'peuffe berte qui s'metteut à couiner aveuc des yius terrorisés. Je m'sus approché et j'ai espliqué à l'homme qu'y s'trompeut, que c'n'est pos in tapint d'sus qu'y l'freut obéir. L'homme y m'a ravisé d'un air méchint : "ti occupe-te d'tes fesses". Comme y'éteut bocop pu costaud qu'mi j'ai continué min qu'min sins réponne mais in pinsint : "y'a vraimint des ébrinnés su terre". Mi, j'ai un quien. C'est fort rare quind y'a un cop d'journal. Inne feus in n'a pos fait attintian, y'a sauté su l'tape d'cuisine et y'a mié les trinques d'foie d'vé prêtes à cuire. Là, j'y ai filé inne rouste. Et bin, l's'monne d'après, y'aarsauté su l'tape et y'a avalé inne pièche d'bure ! Comme quo ça n'aveut servi à ré qu'j'y tape d'sus. L'miux c'est d'aller vir un dresseur d'quiens."

Texte de Jean-Pierre Lefebvre

La Voix du Nord du dimanche 25 novembre 2012