C'est l'rintrée !

"Al sont finies les vaquinces. In peut dire qu'in a eu un bel été. Que caleur ! C't'innée-ci, je n'sus pos déquindu dins l'midi : trop queu ! Je m'sus rabattu su la Bretanne. In a bé dire : y'a des belles séquois à vir in Frince, par eximpe l'Pont d'Normandie : sinsationnel ! Dins l'Morbihan, y'a plon d'tiotes plages, d'tiotes criques, des belles balades à vélo à faire.

J'ai loué un mobil-home dins des quimpings super. Ca permet d'rincontrer plon d'gins v'nint d'pa tous côtés. Et in pusse, à l'épeuque actuelle, in jue à l'pétinque dins tous les coins du pays. Juer aux boules ça permet d'loïer connaissince.

Dins un d'ces quimpings, j'ai rincontré un groupe d'ados d'la région Parisi-inne v'nus passer huit jours aveuc inne animatrice et un animateur. Inne équipe super ! Au début, y z'aveutent peur d'min tiot quien... La plupart y n'aveutent jamais caressé un quien ! J'voreus bé les r'vir : in déméprise tellemint les jonnes des binlieues ! Cuisine, ringemints, vaisselle, arnétiache' tertous volontaires. Et polis aveuc ça ! Feut dire qu'min quien, y'est tellemint amitieux qu'y attire les infints et minme les grinnes personnes. Gus, c'est sin nom."

de J.-P. LEFEBVRE

(Correspondant Local à La Voix du Nord)