Elever un tiot quien

Jean-Pierre Lefebvre élève son tiot quien.

Vos l'avez lu l'eute jour : un homme y'a tué sin quien à cops d'marté et d'couté. Y'a vraimint des arringés. Bé sûr y'a été condamné mais quind minme ! Y'a des gins qui acatent un quien o bé un cat su inne lubie et après c'est la misère pu ces tiotes bertes. C'n'est pos toudis facile d'élever et d'éduquer un tiot quien. J'in sais queute quose : j'essaie de l'faire du miux possipe aveuc min tiot quien. Y sait déjà faire assis, couqué. Quind j'y donne un tiot morcé d'vi-inne, j'y dit : "Douchemint !". Et y l'prind délicatemint. L'matin m'finme al déquind dins l'cuisine pou lire la Voix du Nord. Après al roule l'journal et al le donne au tiot quien qui l'prind dins s'gueule et me l'amonne dins min lit. Quind y' a fait queute quose d'travers y va s'mucher sous l'tape o bé dins les buissons du gardin. Et pou l'faire arv'nir tintin. Pou éduquer un tiot quien y feut bocop d'pati-ince, bocop répéter, bocop récompenser et surtout y donner l'tindresse qu'y attind. Dins l'fond çà r'ssinne à élever un infint.

La Voix du Nord du dimanche 27 novembre 2011